ԳԵՂԱՐՔՈՒՆԻՔԻ ՄԱՐԶՊԵՏԱՐԱՆԻ ՍՏՈՐԱԲԱԺԱՆՈՒՄՆԵՐԸ ՄԱՐԶՊԵՏԻՆ ՆԵՐԿԱՅԱՑՐԻՆ ՏԱՐԵՎԵՐՋՅԱՆ ՀԱՇՎԵՏՎՈՒԹՅՈՒՆՆԵՐԸ

եղարքունիքի մարզպետ Նվեր Պողոսյանը դեկտեմբերի 22-ին հրավիրված հատուկ նիստում, որին մասնակցում էին նաեւ հասարակական կազմակերպությունների եւ զանգվածային լրատվության միջոցների ներկայացուցիչներ, ընդունեց Գեղարքունիքի մարզպետարանի ստորաբաժանումների ղեկավարների տարեկան աշխատանքային հաշվետվությունը:Վարչությունների պետերը եւ առանձնացված բաժինների վարիչները ներկայացրին ինչպես տարվա ընթացքում կատարված աշխատանքներն ու ձեռքբերումները, այնպես էլ բացթողումները եւ հիմնախնդիրները: Ոլորտ առ ոլորտ կանգ առնելով հատկապես բացթողումների ու առաջացած հիմնախնդիրների վրա` մարզպետ Նվեր Պողոսյանը ստորաբաժանումների ղեկավարներին հրահանգեց գալիք աշխատանքային տարվա հենց սկզբից  մշակել եւ ներկայացնել աշխատանքային այնպիսի ծրագիր ու հայեցակարգ, որի արդյունքում շեշտը դրվի արդյունավետության բարձրացման եւ թերացումների շտկման վրա: Բոլոր աշխատանքները պետք է լինեն ժամանակին ու ճիշտ կատարված, ոլորտները` հնարավորինս համակարգված, գործողությունները` հրապարակային եւ թափանցիկ: Մարզպետը հրահանգեց նաեւ աշխատանքի հանդեպ խստապահանջությունը փոխանցել վարչությունների ու բաժինների աշխատակիցներին` ձգտելով միշտ բարձր հիմքերի վրա պահել աշխատանքային կատարողական կարգապահությունը, մասնագիտական հմտությունները եւ աշխատանքի հանդեպ պատասխանատվությունը: Մոտ չորս ժամ տեւած հաշվետու նիստը ամփոփելով` մարզպետը նշեց, որ մարզպետարանի աշխատակազմի ստորաբաժանումներն ընդհանուր առմամբ դրվատանքի արժանի աշխատանք կատարել են, սակայն դեռեւս անելիքները մնում են բոլոր ոլորտներում, եւ ոչ մի դեպքում չպետք է հանգստանալ ու բավարարվել ձեռք բերածով, այլ միշտ նայել դեպի առաջ: Նիստին մասնակցում էին նաեւ մարզի սոցիալական ծառայությունների տարածքային գործակալությունների պետերը, որոնք նույնպես հանդես եկան տարեկան հաշվետու զեկուցմամբ` խոսելով ոլորտում առկա անելիքների եւ հիմնախնդիրների մասին: Նվեր Պողոսյանը հրահանգեց հատկապես խիստ հսկողության տակ վերցնել ՀՀ կառավարության կողմից ամանորյա տոնի կապակցությամբ սոցիալապես անապահով ընտանիքներին հատկացված ձեթի բաշխումը` բացառելով որեւէ խախտման կամ յուրացման դեպք: Բաշխումը պետք է կատարվի ՀՀ կառավարության կողմից տրամադրված ցուցակներով, միայն ստացողի անձնագիրը ներկայացնելու դեպքում եւ հնարավորինս արագ ու սեղմ ժամկետներում, առանց ավելորդ քաշքշուկներ ստեղծելու:

Posted in: ՄԱՐԶԱՅԻՆ ԼՐԱՀՈՍ