Հունիսի 5-ին Գավառի պետական համալսարանում տեղի ունեցավ հանդիպում ՀՀ Նախագահին առընթեր Սեւանա լճի հիմնահարցերի հանձնաժողովի նախագահ, գյուղատնտեսական գիտությունների դոկտոր, պրոֆեսոր Վլադիմիր Մովսիսյանի հետ: Հանդիպմանը մասնակցում էին Գավառի պետհամալսարանի պրոֆեսորադասախոսական կազմը` ԳՊՀ ռեկտոր Ռուզաննա Հակոբյանի գլխավորությամբ եւ տարբեր ֆակուլտետների ուսանողներ:
Հանդիպմանը Վլ. Մովսիսյանը խորությամբ եւ բազմակողմանիորեն ներկայացրեց Սեւանա լճի առջեւ ծառացած խնդիրները: ՙՍեւանը մեր ազգային հարստությունն է, այն տասնամյակներ շարունակ որդիաբար կատարել է իր պարտքը, ժամանակն է այդ պարտքը փոխհատուցելու` լուծելով Սեւանի հիմնախնդիրները՚,- նշեց Սեւանա լճի հիմնահարցերի հանձնաժողովի նախագահը:
Ըստ Վլ. Մովսիսյանի` նախատեսված է տարեցտարի բարձրացնել Սեւանի մակարդակը: Վերջին տարիներին ակնհայտ է լճի մակարդակի բարձրացումը, եւ լճի մակարդակի բարձրացման 2011 թվականի ցուցանիշը այսօր արդեն համապատասխանում է 2013 թվականի համար նախատեսված նիշին:
Բաց դասի ավարտին Վլադիմիր Մովսիսյանը պատասխանեց ուսանողներին եւ դասախոսներին հետաքրքրող հարցերին: Կարեւորվեց Սեւանա լճի բնապահպանական, սոցիալ-տնտեսական, ռեկրեացիոն նշանակությունը, ջրային պաշարների խելամիտ եւ խնայողաբար օգտագործման, լճի բնապահպանական հավասարակշռության ապահովման, ափամերձ տարածքների մաքրության պահպանման անհրաժեշտությունը: Հանդիպումը ամփոփեց ԳՊՀ ռեկտոր Ռուզաննա Հակոբյանը` Վլադիմիր Մովսիսյանին հղելով երախտիքի խոսքեր` ուսանելի եւ բովանդակալից հանդիպման համար:
0 comments:
Отправить комментарий