ՆՐԱՆՔ ՍԻՐՈՒՄ ԵՆ ՀԱՅԻՆ ՈՒ ՀԱՅԿԱԿԱՆԸ

Մայիսի 13-ին Գավառի ավագ դպրոցում հավաքված  Գեղարքունիքի մարզի ԱՄՆ Խաղաղության կորպուսի կամավորները նշում էին Խաղաղության կորպուսի ստեղծման 50 ամյակը: Կամավորներն  իրենց կազմակերպության տարեդարձին մասնակցելու էին հրավիրել իրենց ընկերներին, գործընկերներին եւ այն հյուրընկալող ընտանիքներին, որտեղ իրենք ապրում են: Խաղաղության կորպուսի տարեդարձի միջոցառումը կազմակերպել էին Գավառի ՙՕրհուս՚ կենտրոնի կամավոր Բրայան Հոլը եւ Վաղաշենում ուսուցչությամբ զբաղվող Քայլ Դորանը: 

 Գեղարքունիքի մարզում իրենց առաքելությունները կատարող 8 կամավորները, ովքեր բնակվում են Վաղաշենում, Մադինայում, Վարդենիկում, Մարտունիում, Սեւանում եւ Գավառում, հայերենով ներկաներին պատմեցին  իրենց մասին, ներկայացրեցին այն աշխատանքներն ու ծրագրերը, որոնք կյանքի են կոչվում իրենց կողմից: Ընկերների տոնակատարությանը միացել էր նաեւ Իջեւանի կամավոր Մաթթ Քրուլեյ Միանոն: Նա իր խոսքում նշեց, որ շատ է սիրում Գավառ քաղաքը, քաղաքի բնակիչներին ու այն ջերմությունն ու մարդասիրությունը, որը  բնորոշ է մեր տարածաշրջանին:

 Վաղաշենում բնակվող եւ իր առաքելությունները կատարող Քայլ Դորանը, ով վարում էր օրվա միջոցառումը, իր կիսավարժ հայերենով ՙԳեղամա աշխարհին՚ տեղեկացրեց, որ Խաղաղության կորպուսը հիմնադրել է Ջոն Ֆ. Քենեդին 1961 թվականին` աշխարհում խաղաղություն ու բարեկամություն սերմանելու նպատակով: Խաղաղության կորպուսի ստեղծման օրվանից աշխարհի 139 երկրներում ծառայել է շուրջ 700 կամավոր: Հայաստանի Հանրապետության եւ ԱՄՆ  կառավարությունների միջեւ կնքված համաձայնագրի վավերացումով 1992 թվականից Հայաստանում շուրջ 700 կամավոր է ծառայել Հայաստանի տարբեր գյուղական վայրերում:

 Համայնքի եւ բիզնեսի զարգացման, անգլերենի  ուսուցման, առողջապահական  եւ բնապահպանական կրթության ոլորտներում այսօր արդեն աշխատում է շուրջ 97 կամավոր: 

 Քայլ Դորանը խոսեց նաեւ  աղաղության կորպուսի նպատակների եւ ծրագրերի մասին, որոնք նախատեսվում են իրականացնել կամավորների ջանքերով: 

 Կամավորները տարեդարձի մասնակից  հյուրերին ցուցադրեցին մի տեսաֆիլմ, որը պատմում էր Սիդի մասին: Սիդը ԱՄՆ-ից է, սկզբում աշխատել է Վանաձորում, այնուհետ շուրջ 2 տարի ապրել ու աշխատել է Վարդենիկ գյուղում` ինտեգրվելով ու նմանվելով գյուղում ապրող իր հասակակից աղջիկներին: 

 Քայլ Դորանը  մեր թղթակցին պատմեց, որ իր համար շատ հարազատ է Վաղաշենը ու բոլոր վաղաշենցիները: Նա սիրում է մեր կենցաղն ու հայկական  վարքուբարքը:

 -Եթե Հայաստանից գնամ, ինձ հետ կտանեմ իմ հարազատների սերն ու ջերմությունը, ես ամենաշատը սիրում եմ Հայաստանի տատիկներին,- ավարտեց իր խոսքը Քայլ Դորանը:

 Խաղաղության կորպուսի կամավորները վերջում հյուրերի համար կազմակերպեցին հյուրասիրություն` առաջարկելով ճաշակել ամերիկյան ուտեստ եւ բլիթներ:  

Անի Պողոսյան

Posted in: ՆՐԱՆՔ ՍԻՐՈՒՄ ԵՆ ՀԱՅԻՆ ՈՒ ՀԱՅԿԱԿԱՆԸ