Գեղարքունիքի մարզպետ Նվեր Պողոսյանն արդեն վավերացրել է ՀՀ Անկախության 20-րդ տարելիցի տոնակատարություններին նվիրված միջոցառումների ծրագիր-ժամանակացույցը:
Միջոցառումների ծրագրի շրջանակներում նախատեսվում է մարզի հանրակրթական դպրոցներում, մշակութային հաստատություններում ստեղծել պատի թերթեր ու վահանակներ` Անկախության օրվան նվիրված: Կստեղծվեն ցուցահանդեսներ, կկազմակերպվեն դպրոցական գրական-երաժշտական ցերեկույթներ:
Ինչպես հայտնեցին Գեղարքունիքի մարզպետարանի աշխատակազմի ԿՄՍ վարչությունից` 2011-2012 ուսումնական տարում մարզի հանրակրթական դպրոցներում նախատեսվում է անցկացնել <<Անկախություն-20>> թեմայով բաց դասեր:
Սեպտեմբերի 21-ին մարզկենտրոն Գավառ քաղաքում կկայանա հանդիսավոր նիստ, որտեղ նախատեսվում են մեծարման ու պարգեւատրման արարողություններ մարզի եւ համայնքների ղեկավարների կողմից, որին էլ կհաջորդի տոնական համերգը: Մարզկենտրոնում կազմակերպվող միջոցառումը կիրականացվի ՀՀ պետբյուջեի ֆինանսավորմամբ:
Անկախության տոնի շրջանակներում սեպտեմբեր ամսին նախատեսվում են մարզում կազմակերպել բռնցքամարտի եւ ձեռքի գնդակի մարզային առաջնություններ եւ վազքարշավ: Հոկտեմբերի առաջին տասնօրյակում կյանքի կկոչվի մարզի ստեղծագործողների փառատոնը: Նոյեմբերին կայանալիք <<Ուսանողական աշուն>> փառատոնը եւս նվիրված կլինի Հայաստանի Հանրապետության Անկախության տարելիցին: Վերջին երկու միջոցառումները եւս կֆինանսավորվեն ՀՀ պետբյուջեի միջոցներով:
Գեղարքունիքի երկրագիտական թանգարանում կայանալիք <<Հայաստանի երեք հանրապետությունները>> խորագրով ցուցադրությունը կեզրափակի տոնական միջոցառումների շղթան:
Տոնական օրերին սպորտլանդիայով հանդես կգան Գեղարքունիքի մանկապարտեզները: Մրցույթի մեկնարկը արդեն տրված է: Նախատեսվում է սեպտեմբերի 1-15-ը կազմակերպել մանկական սպորտլանդիայի տարածքային փուլը, իսկ սեպտեմբերի 20-ին` իրականացնել մարզային փուլը:
Անկախության 20-ամյակը կնշվի մարզի հինգ քաղաքային համայնքներում, կլինեն տոնական համերգներ, հրավառություններ, ելույթներով հանդես կգան հանրապետական ճանաչում ձեռք բերած երգիչներ ու երաժիշտներ:
Անի Պողոսյան
0 comments:
Отправить комментарий