Դպրոցի տարեգրության մեջ պահպանվել են տնօրեններ Սերյոժա Դանագուլյանի, Սուրեն Անտոնյանի եւ Արամայիս Ղազանչյանի անունները:
1976 թվականին դպրոցի 10 ուսուցիչների` տեխնիկական միջոցների գործածմամբ դասավանդման փորձը ներկայացվել է Մոսկվայում` ԺՏՆՑ-ում եւ արժանացել արծաթե մեդալի: Ուսուցիչները ստացել են պատվոգրեր, իսկ դպրոցի տնօրեն Էմմա Գրիգորյանը, ի գնահատումն իր աշխատանքային վաստակի, ուսուցիչների միութենական համագումարի պատգամավոր է ընտրվել: Դպրոցը նախատեսված է 1000-1200 աշակերտի համար: Յուրաքանչյուր տարի դպրոցն ավարտել են 70-80 աշակերտ, որոնցից 5-8-ը եղել են մեդալակիրներ:
Դպրոցի շրջանավարտների շարքերում կան բժշկագիտության դոկտորներ, դոկտոր-պրոֆեսորներ, գիտությունների թեկնածուներ, բժիշկներ ու ճանաչված մանկավարժներ, անվանի մարդիկ, որոնք իրենց լուման են ներդրել մեր պետականության կերտման գործում: Անկախության առաջին իսկ օրերից դպրոցի մանկավարժական կոլեկտիվը տնօրեն Նորիկ Դաբաղյանի, ապա Մելանիա Հովակիմյանի գլխավորությամբ ձեռնամուխ է եղել դպրոցին ներկայացվող պահանջներին համապատասխան կրթօջախը նորացնելու, զարգացնելու, մատաղ սերնդի կրթության ու դաստիարակության գործընթացն իրականացնելու դժվարին գործին: Դպրոցի ուսուցիչներն ակտիվորեն մասնակցում են ամենատարբեր մրցույթների, սեմինարների, գիտաժողովների, որոնց արդյունքում դպրոցում ներդրվում են նոր մեթոդներ, ամրապնդվում է դպրոց-համայնք կապը: Դպրոցում հաճախ են կազմակերպվում հետաքրքիր միջոցառումներ, որոնցում ընդգրկվում են ոչ միայն աշակերտներ, այլեւ ուսուցիչներ, ծնողներ, համայնքի ներկայացուցիչներ, հանգամանք, որի շնորհիվ սերտանում ու ջերմանում են ծնող-ուսուցիչ-աշակերտ եւ դպրոց-համայնք կապերը:
Կրթօջախը համագործակցում է տարբեր հասարակական կազմակերպությունների հետ: Այսպես օրինակ, 2004 թվականի նոյեմբերին դպրոցի մանկավարժական կոլեկտիվի եւ ծնողական խորհրդի ներկայացուցիչները մասնակցեցին ՀԵՆԿ-ի կազմակերպած ՙԱկտիվ դպրոցի մոդել՚ թեմայով սեմինարին: Դպրոցի ուսուցիչներն ակտիվորեն մասնակցում են հասարակական կյանքին: Նրանցից շատերը ՀԿ նախագահ, անդամներ ու ներկայացուցիչներ են տարածաշրջանում: Աշակերտությունը եւ ուսուցիչները անհրաժեշտության դեպքում օգտվում են այդ կազմակերպությունների գրադարաններց:
Դպրոցի լավագույն աշակերտներն ակտիվորեն մասնակցում են ԿԳՆ կողմից կազմակերպվող առարկայական օլիմպիադաներին, բազմաբնույթ մրցույթներին: Նրանցից ոմանք օլիմպիադաների հանրապետական փուլերում արժանացել են երկրորդ, երրորդ կարգի դիպլոմների, պատվոգրերի: Այդ աշակերտներից են Անի եւ Վահագն Ռափյանները, Սուրեն Խաչիկյանը, ովքեր իրենց ուսումն այժմ գերազանցությամբ շարունակում են Երեւանի բժշկական, Երեւանի Պետական, Գավառի Պետական համալսարաններում: Դպրոցի տնօրեն Մելանյա Հովակիմյանը եւ հայոց լեզվի ու գրականության ուսուցչուհի Գոհար Աքելյանը Հայ Առաքելական եկեղեցու եւ ԿԳՆ կողմից կազմակերպած մրցույթներում հաղթող են ճանաչվել եւ արժանացել դիպլոմների ու դրամական պարգեւների: Դպրոցի փոխտնօրեն Գայանե Խանամիրյանն արժանացել է ՀՀ կառավարության եւ Ազգային ժողովի պատվոգրերի: Վերջին երեք տարիներին դպրոցը IREX-ի ՄԴՈՒՎԾ ծրագրով ուսուցիչների վերապատրաստման կենտրոն է հանդիսացել: Կրթօջախն ունի հարուստ գրադարան, որը համալրվել է Համալսարանական կրթությամբ կանանց ասոցիացիայի (Գավառի մասնաճյուղի նախագահը դպրոցի փոխտնօրեն Ա. Մանուկյանն է) եւ IREX-ի տրամադրած իրավական եւ ուսումնամեթոդական գրականությամբ:
Դպրոցն ունի լավ վերանորոգված մարզադահլիճ, որը նպաստում է ֆիզկուլտուրայի արդյունավետ դասավանդմանն ու բազմաբնույթ մարզային միջոցառումների ու մրցույթների անցկացմանը: Այսօր դպրոցական կյանքի ամենալուսավոր կետը Բանավեճի ակումբի (ղեկավար` պատմության եւ իրավունքի ուսուցչուհի Լ. Խզմալյան) ակտիվ աշխատանքն է, որը աշակերտներին տալիս է իրավական եւ բազմաբնույթ գիտելիքներ, ինչպես նաեւ բանավեճի մշակույթի, քաղաքացիական հասարակության ակտիվ քաղաքացիների ձեւավորման համար անհրաժեշտ գիտելիքներ եւ հմտություններ:
Դպրոցն ունի նաեւ ստեղծագործող աշակերտներ, ովքեր մասնակցել են քաղաքային, մարզային, հանրապետական մրցույթների` գրավելով մրցանակային տեղեր: Այդ աշակերտներից են Աննա Մկրտչյանը, Սեդա Աֆրիկյանը, Լուսինե Բադալյանը, Ռիմա Հասասյանը: Իսկ Նինել Խաչատրյանն էլ արժանացել է ՀՀ վարչապետի կողմից սահմանված հատուկ մրցանակին: 2010թ. մարտին դպրոցը ՙԿրթություն հանուն կայուն զարգացման հիմնադրամի՚ դրամաշնորհային մրցույթի շրջանակներում իրականացրեց ՙՀասարակայնորեն ակտիվ դպրոց՚ ծրագիրը: Ծրագիրն էլ ավելի ամրապնդեց դպրոց-համայնք կապը: Իրականացվեց ՙՕգնություն դպրոցական գրադարանին՚ բարեգործական ակցիան, որի արդյունքում դպրոցի գրադարանը համալրվեց համայնքի բնակիչների նվիրաբերած գրքերով:
0 comments:
Отправить комментарий