Արդեն մեկ ամիս է, ինչ Գեղարքունիքի մարզի Մարտունի, Գավառ, Սեւան եւ Ճամբարակ քաղաքներում ընթանում են բազմաբնակարան շենքերի կտուրների հիմնանորոգման աշխատանքներ: Ինչպես տեղեկացրեց Գեղարքունիքի մարզպետարանի աշխատակազմի քաղաքաշինության վարչության կապիտալ շինարարության բաժնի վարիչ Արմեն Զոհրաբյանը՝ ՀՀ կառավարության պահուստային ֆոնդից տրամադրված միջոցների հաշվին 4 բազմաբնակարան շենքի կտուր նորոգվում է Մարտունի, երեքական շենքերի կտուրներ՝ Գավառ եւ Սեւան եւ երկու շենքի կտուրներ՝ Ճամբարակ քաղաքներում: Ամբողջությամբ փոխվում են փայտյա կրող կոնստրուկցիաները, ջրահեռացման համակարգը, շիֆերները փոխարինվում են ցինկապատ թիթեղներով: Այսօրվա դրությամբ Գավառում, Սեւանում եւ Ճամբարակում ավարտին են հասցվել մեկական բազմաբնակարան շենքերի տանիքների նորոգման աշխատանքները: Մեկական շենքերի տանիքների նորոգման աշխատանքներն էլ մոտենում են ավարտին, մինչդեռ Մարտունի քաղաքում դրանք դեռեւս նոր են սկսվում: Գեղարքունիքի մարզի քաղաքային վերոնշյալ 4 համայնքների բազմաբնակարան շենքերի կտուրների հիմնանորոգման համար ՀՀ կառավարության պահուստային ֆոնդից հատկացվել է 178 միլիոն դրամ, որը բաշխվել է հետեւյալ կերպ. Մարտունի՝ 45 միլիոն դրամ, Գավառ՝ 48 միլիոն դրամ, Սեւան՝ 57 միլիոն դրամ եւ Ճամբարակ՝ 28 միլիոն դրամ: Հիմնանորոգման աշխատանքները նախատեսված է ավարտել այս տարվա նոյեմբեր ամսին:
0 comments:
Отправить комментарий