ՀՀ Կրթության եւ գիտության նախարարության ՙԿրթական ծրագրերի կենտրոն՚ ԾԻԳ-ը ՙԿրթության որակ եւ համապատասխանություն՚ երկրորդ վարկային ծրագրի շրջանակներում Գեղարքունիքի մարզում իրականացնում է ատեստավորման ենթակա ուսուցիչների վերապատրաստման դասընթացներ:
Ատեստավորման են ենթակա հանրապետության բոլոր ուսուցիչները: Ինչպես տեղեկացրին Գեղարքունիքի մարզպետարանի աշխատակազմի կրթության, մշակույթի եւ սպորտի վարչությունից` ծրագիրը շարունակական է եւ տեւելու է 5 տարի: Յուրաքանչյուր տարում վերապատրաստվելու է ուսուցիչների 20 տոկոսը:
Դասընթացներ իրականացնող երաշխավորված կազմակերպությունները Գեղարքունիքի մարզում երկուսն են` ՀՀ Կրթության եւ գիտության նախարարության ՙԿրթության ազգային ինստիտուտ՚ ՓԲԸ եւ ՙԿրթություն առանց սահմանների՚ կազմակերպությունը: Այդ կազմակերպություններին տրամադրվել են դրամաշնորհներ` վերապատրաստումների կազմակերպման համար: Գեղարքունիքի մարզի ուսուցիչների ցանկերը կազմակերպությունները ստացել են Կրթության եւ գիտության նախարարության հանրակրթության վարչությունից: Առաջին փուլում ուսուցիչների վերապատրաստումներն ըստ մասնագիտությունների եւ առարկաների սկսվել են 2011թ. օգոստոսից եւ ընթանում եմ երեք փուլով: Առաջին ենթափուլն արդեն ավարտվել է, երկրորդը դեռ ընթացքի մեջ է, իսկ երրորդը չի սկսվել:
Վերապատրաստում անցած ուսուցիչներին տրվել եւ տրվում են վկայականներ, որոնք ունեն վավերականության վեց ամիս ժամկետ, որի ընթացքում ուսուցիչը պետք է ատեստավորվի, իսկ եթե ոչ, ապա վկայականի ուժը կորցրած կհամարվի, եւ ուսուցիչը ստիպված կլինի կրկին վերապատրաստվել, բայց այս անգամ` մայրաքաղաքում:
Յուրաքանչյուր կազմակերպություն դասընթացներն ըստ առարկաների անցկացնում է մարզի Գավառ, Մարտունի եւ Սեւան քաղաքների դպրոցներում: Իսկ ֆիզկուլտուրա, երգեցողություն, կերպարվեստ առարկաների գծով ուսուցիչները վերապատրաստվում են մայրաքաղաքում:
Հասմիկ Գրիգորյան
0 comments:
Отправить комментарий